Група сенатори во САД поднесоа нацрт-закон за ембарго против компаниите кои учествуваат во продажбата на руска нафта и гас на Кина. Официјален Пекинг соопшти дека нема да толерира мешање на никого однадвор во внатрешната политика на Кина.
Америка ѝ се заканува на Кина со воведување санкции поради соработката со Русија. Група сенатори во САД веќе поднесоа предлог-закон за ембарго на компаниите кои учествуваат во продажбата на руска нафта и други енергетски производи на Кина, а сега се чека да биде разгледан и усвоен во Конгресот. Пекинг остро го осуди и рече дека ниту една надворешна сила нема да ја спречи нејзината соработка со Москва.
Поддршка за Русија
Марко Рубио – Со купување на руска нафта, Кина ја поддржува руската агресија врз Украина.
Американската агенција Блумберг објави дека во вторникот републиканскиот сенатор Марко Рубио претставил нацрт-закон за воведување санкции за сите компании кои обезбедуваат или регистрираат танкери за транспорт на нафта или течен природен гас од Русија до Кина.
– Со купување на руска нафта, Кина ја поддржува руската агресија против Украина – изјави Рубио.
Тој предлог-закон треба да биде разгледан во американскиот Конгрес. Доколку биде одобрен, тогаш ќе се гласа за негово усвојување, а администрацијата на американскиот претседател Џо Бајден на крајот би можела да го спроведе, што би имало огромни последици за односите меѓу САД и Кина.
Соработка
Џао Лиџијан – Соработката меѓу Пекинг и Москва не е насочена против други земји и не е под влијание на надворешни фактори
Владата на кинескиот претседател Си Џинпинг веднаш реагираше жестоко на оваа иницијатива на американските сенатори. Портпаролот на Министерството за надворешни работи Џао Лиџијан во Пекинг рече дека Кина нема да толерира мешање од надворешни лица во нејзината политика.
– Кина цврсто се противи на еднострани, незаконски санкции. Соработката меѓу Пекинг и Москва не е насочена против други земји и не е под влијание на надворешни фактори – рече Џао.
Тој додаде дека Кина исто така се противи на американската примена на вонтериторијална јурисдикција.
– Кина одржува нормална трговска и економска соработка со Русија врз основа на взаемно почитување, еднаквост и взаемна корист – посочи Џао.
Рускиот министер за надворешни работи Сергеј Лавров предупреди дека Кина, по Русија, може да биде цел на западните санкции.
– НАТО по ред ги именува своите непријатели. Русија е број еден. Кина е на второ место – рече Лавров.
Тој додаде дека може да се прекршат сите принципи доколку Западот реши некого да казни.
– Воопшто не се сомневам дека ако треба истото ќе го направат и на која било друга земја, што на некој начин ќе ги иритира. Како можна следна цел веќе ја споменав Кина – истакна Лавров.
Рекорден увоз на нафта
Инаку, Кина неодамна го зголеми увозот на нафта и други енергетски производи од Русија. Според последните податоци, во мај увезла рекордно количество руска нафта – дури 8,42 милиони тони, што е за 55 отсто повеќе во однос на истиот период лани. Русија на тој начин го зазеде местото на Саудиска Арабија, која беше главен снабдувач на Кина на нафта. Во истиот месец Кина го зголеми увозот на руски природен гас за 80 отсто во споредба со минатата година. Достапните податоци покажуваат дека Пекинг во мај им дал на руските енергетски компании 7,47 милијарди долари, што е за 1 милијарда повеќе отколку во април.
Број
Кина во мај на руските енергетски компании им дала 7,47 милијарди долари, што е рекордна сума
Москва се надева дека законот нема да биде усвоен
Портпаролот на Кремљ, Дмитриј Песков, вчера изјави дека Москва се надева оти нема да се спроведе иницијативата на американските сенатори за воведување санкции за руските енергетски испораки за Кина.
– Да се надеваме дека оваа иницијатива ќе остане во почетна фаза – рече Песков.
Тој не откри какви мерки ќе преземе Русија доколку иницијативата на американските сенатори биде усвоена во закон.
